由關文深監製、朱鏡祺及劉小群擔任編審的無綫台慶劇《G-NiiB 微生態配方特約:下流上車族》, 本周一至五晚八點半翡翠台播出結局篇。本周進入結局周的《下流》高潮一浪接一浪, 除了車氏夫婦的關係再度惡化, 兩大配角鄧智堅及朱凱婷 (Heidi) 的演出同樣搶焦!
昨晚一集講到毓霞(鮑起靜飾)決定將志明(林敏驄飾)加進公屋戶籍,志明動用了與雯慧 (江美儀飾) 聯名戶口內的 12 萬港元裝修公屋, 雯慧發現後大動肝火踩上門鬧爆毓霞、志
明,並再度埋怨志明當年落錯車:「如果唔係咁, 我哋依家移咗民住緊 House 啦, 你啲朋友
冇個好人, 呃飲呃食!」在場的細孝(鄧智堅飾)聞言即下跪道歉, 並大爆志明落錯車真
相:「你哋落錯車唔係因為金融風暴,係因為我,車總賣咗層樓幫我周轉。」
被瞞足 14 年的雯慧即場大發爛渣, 志明見狀即激動反駁:「當年個市係咁(差),你知架嘛!」豈料雯慧大嗌「咩都唔知」, 細孝此時插嘴謂:「當初賣咗層樓你係同意架,你做咗幾廿年人, 可以話咩都唔知? 一句講晒, 90 萬我就還清架喇,從今以後我哋各不相欠!」說罷更即時離開。打算勸架的毓霞, 反成雯慧發洩目標, 雯慧大爆志明是處心積慮騙其公屋:「你兩個老公一早死咗, 第一個仔唔理你,第二個仔就呃你,你注定孤獨終老!」毓霞知道真相後大受打擊暈倒……
同驄哥過招嗌好玩
於這場戲表現亮眼的智堅, 受訪時透露原來當日是即興「打大佬」:「本身嗰日唔係拍呢場, 但因為拍攝進度良好, 咁啱嗰日都係拍呢班演員, 就話不如拍埋呢場啦, 最大挑戰就係冇心理準備就要拍!」智堅續指拍攝前大家對了幾次稿, 並謂最緊要是理順劇中角色當時的關係。講到不少網友大讚他與驄哥默契十足, 智堅笑言:「本身我都係調皮嘅人, 所以遇着調皮嘅驄哥係好開心,當然我唔夠佢嚟啦, 佢簡直就係周身刀張張利嘅『周伯通』, 功夫好強勁, 不停接佢招係好好玩!」
飾演「八婆表妹」晞嵐的 Heidi 同樣搶眼, 昨晚劇情講到晞嵐陪雯慧行街散心, 豈料撞正晞嵐老公另有女伴, 原來晞嵐與老公早已分居, 惟晞嵐不願接受現實不肯簽字離婚。雯慧得悉真相後原打算安慰晞嵐,豈料晞嵐毫不留情反罵雯慧:「依家老公要同我離婚, 你覺得我好慘? 我同樣睇緊你點衰!」、「我係衰呀, 但我好彩有你墊屍底!」、「邊個係你親人? 你一直都係我工人咋!」搣甩斯文高貴形象的 Heidi, 今次飾演搞是搞非表妹一角入型入格, 獲得不少網友好評:「表妹被江美儀踢爆離婚即時反面, 反差好大,人性的弱點大爆發, 好好睇!」、「朱凱婷演戲都 OK 喎」、「朱凱婷今次攪屎棍角色做得幾有發揮, 飛躍進步應留一個獎畀佢。」
感謝美儀姐幫忙帶入戲
講到這場一分多鐘的爆 Seed 戲, Heidi 受訪時透露:「我拍劇經驗唔算多, 美儀姐好好, 佢事前同我傾好多偈溝通, 令我可以放鬆去演, 雖然啲對白比較長, 但啲情緒已經入晒個角色, 大約兩 Take 就搞掂。」Heidi 笑言現在出街會偶爾被鬧衰表妹, 不過她亦不忘為「晞嵐」平反:「佢唔係徹底嘅衰人, 其實仲有啲可憐,雖然表面好似好潑辣, 但其實佢都係受害者, 佢叫表姐千祈唔好講『離婚』呢兩個字,其實只係將自己投射咗喺表姐身上。」Heidi續指現時已拋下所有包袱, 無論甚麼角色都想嘗試。
