（2023年3月13日）無綫綜藝歌唱真人騷《馬百良安宮牛黃丸呈獻：中年好聲音》，逢周日晚上8點半翡翠台播出。昨（12日）晚播出的第十五集，是第六部曲故事之歌《十強戰！首回合生死鬥！》，支嚳儀（Venus）、周吉佩（吉吉）獲得最高分82分，至於僅獲得70分的梁浩銓則被淘汰。
周吉佩太太曾反對參賽
昨晚最大洋蔥位，是獻唱《留給這世上我最愛的人》的吉吉。吉吉與太太黃彥欣一同接受製作組訪問，曾出道做歌手的吉吉音樂路一直浮浮沉沉，在人生最落泊時他認識了太太，他說：「當時係佢執番起我，冇佢撐住，我唔知會點。」而吉吉今次參加《中年好聲音》原來是先斬後奏，黃彥欣說：「曾經反對過佢參加比賽，仲鬧咗好大場交，當時係焗住要接受，但佢同我講：『唔使擔心，我唔同以前，依家長大咗，係一個好老公好爸爸，我會有承擔。』到咗依家呢一刻，我仲緊張過佢。」最後吉吉發表愛的宣言：「我承諾過照顧你一生一世，所以我一定會照顧到你離開一刻。」
Eric Kwok：識你咁耐最好一次
吉吉在台上透露《留給這世上我最愛的人》是送給亡父和太太，單親家庭長大的他哭着說：「後悔冇請過爸爸飲一餐茶…好多謝佢教識我要樂觀做人。」之後他再感謝太太：「我做歌手時好失敗，但佢冇嫌棄我又窮又冇出色，就算連份工都冇埋，佢都係好支持我，多謝太太呢十幾年對我不離不棄。」吉吉真摯的演出，為他贏得82分，肥媽感動得「講不出聲」：「唱得好好，好Feel到個感情，唔講喇……」Eric Kwok則說：「你今日嘅表演係我識你咁耐最好嘅一次。」
太技巧出事？
而與媽媽一同接受製作組訪問的Venus，原來年輕時曾經反叛過，她說：「反叛期都有試過離家出走，搞到媽咪好傷心，諗番起都好對唔住媽咪。」之後Venus公開感謝媽媽：「如果唔係有媽咪，今日就唔會有支嚳儀，媽咪用咗大半世嚟照顧我，媽咪你下半世就交畀我！」語畢兩母女擁作一團，好不溫馨。
Venus獻唱《If I Ain’t Got You》送給媽媽，雖然獲得82分，但評審的意見卻出現兩極，張佳添說：「一個成功嘅藝人，要畀人認識到你係邊個，你係有自己影子
喺首歌入面，你冇去學任何人唱，我聽到嘅係支嚳儀。」Eric Kwok則說：「完全係FeeL唔到你係唱畀你阿媽聽，反而覺得你係想講『我要叻畀你睇一次』，呢隻歌啲技巧太犀利，你個CPU係應付緊技巧上嘅嘢，你想同媽咪講嘅嘢我係connect唔到。」
至於獻唱《時光倒流二十年》的梁浩銓，僅獲70分全晚最低分，張佳添說：「今日把聲有啲緊，有啲走音情況。」Eric Kwok直言：「覺得你係中年，有把好聲，但係冇音！覺得你太顧人點睇你，成個表演淨係顧個技巧，入唔到隻歌講唔到個故仔。」最終被淘汰的浩銓說：「多謝《中年好聲音》畀機會我，可以收復番以往缺失嘅關係。」並笑言想盡快和多年未見的爸爸媽媽食番餐飯。
