（2023年3月1日）由文偉鴻（Jazz）監製、林麗媚、梁恩東編審的《隱形戰隊》，將接棒《新四十二章》由3月6 日起逢周一至五晚八點半翡翠台播映，主要演員包括馬國明、陳山聰、陳展鵬（煎Pan）、江美儀、唐詩詠、劉佩玥、劉穎鏇（Tiffany）、林子善、歐瑞偉、樊亦敏、伍樂怡、郭子豪、楊證樺及程可為等。
揸真槍拍戲最難係唔眨眼？
《隱形》以警隊中的反恐特勤隊（Counter Terrorism Response Unit｜簡稱CTRU）及神秘部隊—隱形任務戰略部隊（POTT Phantom Operation and Tactic Team）如何攜手協力偵破多宗大型案件為故事骨幹，更有連番精彩動作、槍戰、爆破及追逐場面。據知為打造真實感及加強視覺震撼度，不少場面均是荷槍實彈；對此與Jazz合作無間的陳山聰，雖自《同盟》開始已在觀眾心中建立了好打形象，但仍坦言接拍《隱形》至少有兩大挑戰：「特種部隊戲我係第一次演，仲要係反恐，無論造型、身形要求都嚴格好多，包括揸槍。今次揸槍都得到好多方面嘅指導，包括武指同專業人士，同埋因為多真槍，嗰吓槍聲係好猛烈，同真係會有火花，變咗好容易眨眼。Jazz成日提我哋唔好眨眼，我都算係眨得幾多嗰位。出街時你哋見到我哋冇乜點眨，係因為Jazz下咗好多苦功去剪接。」
山聰：今次係我有史以來最大隻
雖已貴為視帝，但山聰為了演出仍是努力做足功課，之前在首輪官方宣傳片曝光的「一人搶兩槍」神技，山聰單是事前反覆練習已花了兩個月時間：「真正拍嘅時候都NG咗好多次，我自己都不斷要求retake，咁努力都係想帶刺激感畀觀眾。」除了苦練槍法及型甫，山聰又花了三個月時間健身鍛煉：「今次係我有史以來最大隻。」又大讚日日一齊操Gym的Tiffany進步神速：「其實我同Tiff同一間Gym嘅，所以變咗嗰時開始我哋已經日日都見，佢今次真係更加進步。」在劇中飾演CTRU Commander，山聰對此笑言私下在家中也是Commander：「我呢個阿頭日日都喺屋企落order，因為係得我嗌得Jaco（陳山聰兒子）聽，所以現實生活我爸爸呢個角色都係Commander嚟。」
至於飾演奸角的煎Pan，則透露最開心是相隔12年後以「身份互換」形式再與好友馬國明合作：「我好記得我喺無綫第一套做男主角嘅劇係《真相》，當年馬國明喺最尾嗰幾集做反派，我同佢都friend，會一齊踢波又剩，當年好多謝佢支持我客串做反派，嗰時我已經講，希望將來有套劇馬明做主角時，我又可以做番反派，客串又好主位又好，呢個係我其中一個喺TVB最大心願。」談到相隔多年再演奸角，煎Pan笑指最希望觀眾能期待和覺得有新鮮感：「因為都咁多年冇做過反派，我一路以嚟最希望就係畀到觀眾新鮮感，所以做咩角色都冇所謂，反派、小角色、客串或反串都好，最緊要觀眾覺得陳展鵬有新鮮感，因為我哋一年裏面可能出幾套劇。」並謂由於拍攝《隱形》時，同時還有拍攝《童時愛上你》及《廉政狙擊》，故此有點分身不暇，幸好與Jazz及劇中一班老拍檔已很了解兼有默契，故拍攝十分順利。
「奸角」陳展鵬宣傳片顯霸氣
根據官方連日來釋出的宣傳片，除了大型案件題材吸引，CTRU及POTT型到爆裂外，其中一條以煎Pan為主角的宣傳片亦相當吸睛，片段所見，飾演擅長迷惑人心的康勝天的煎Pan，不但舉手投足及眼神滿是氣場，就連對白都相當有霸氣：「我康勝天，最鍾意就係啲無可能嘅嘢變成事實。」
