（2023年2月24日）向來愛顛覆大眾想法，傾力炮製超乎想像好節目的 J2（82台），其推出以「優化」罐頭為大前提的飲食節目《奇蹟的罐頭料理》轉眼來到最後一集，平時各顯功夫的四大名廚—楊尚友（Christian Yang）、蔡家富（Gabriel）、徐蒝（Margaret）及陳希裕（Justin），將「破天荒」聚首一堂，以鹹牛肉及五香肉丁罐頭炮製超乎想像派對美食，當中Christian以鹹牛肉+麵粉做外皮的「鹹牛肉乞衣雞」，更獲得一致好評，而且做法完全唔難，值得一試。
專愛整古造怪的J2，由J2ers擔正演出的《罐頭》小劇場，來到最後一周繼續過癮，「結局周」登場的「新臉孔」J2er為黃嘉雯（Carmaney），飾演靚女的她，一襲紅色貼身裙相當亮麗，更慘遭飾演疑似變態佬的馮子亮（Liam）眼神騷擾，最終Carmaney怒請對方食「無情掌」，相當搞笑。自《下流上車族》後日漸上位的Carmaney，工作量日漸增多，除以J2er身份幫J2宣傳及拍攝節目包括《Blah Blah BLAH試新室!!》及《開壇》外，近日還有份參演《廉政狙擊》，飾演以美色釣大鱷回饋胡定欣的義氣靚女。
私下愛型格中性打扮
瓣數多多的Carmaney，事後受訪時坦言主持和演員工作都很喜歡：「因為係唔同嘅挑戰，主持可以Show到我多啲個人性格，同埋好考臨場反應，演員就要做好多準備功夫，好似訓練、讀劇本咁，難度比較高。」談到最近主持J2全新綜藝節目《超級毛特兒大賽》，Carmaney坦言很大挑戰：「第一次係完全冇稿，冇辦法預計有咩突發情況，只可以放鬆自己同盡量Enjoy，咁先可以做到最真實嘅反應畀觀眾。」再問Carmaney現實生活中曾否遇過疑似色狼，她說：「有一次搭港鐵，喺反光鏡見到有個男人偷影我，之後我直接行過去話：『你偷影我』，但佢死口話冇，我就話我明明見到，之後我就叫佢delete咗張相，當時我都幾大聲，因為我想引起大家注意，畀多啲壓力佢！我以前未做藝人前會直接行過去對質，但入咗行之後會深思熟慮多啲。」問到私底下形象會否與藝人Image同樣女性化時，她笑言：「私底下會比較鍾意男仔啲、型啲嘅Style。」
最後一周的罐頭美食料理繼續精彩，除了用粟米罐頭整的「西米布甸」、罐頭辣椒整的「墨西哥辣椒朱古力蛋糕」、及煉奶溝出來的彩色醬汁伴香蕉薄餅外，本周節目中的資訊亦是相當驚爆。首先粟米原來除了食得，仲相當實用，分別試過用嚟整煙花、化妝品、電池、尿片同車軚等等，真係唔講都唔知。另外原來曾經有藝術家將「米田共」製成罐頭當藝術品售賣，價錢更由1961年叫價的37元美金（約290港元）一罐，升值至2007年的9.7萬英鎊（逾92萬港元）一罐，46年共升值逾3,000倍，真是信不信由你。到底呢個離奇升值背後有冇咩特別原因？睇《奇蹟的罐頭料理》自有分曉。
