無綫推出的全新綜藝歌唱真人騷《馬百良安宮牛黃丸呈獻：中年好聲音》，專為35歲或以上的朋友而設，讓一眾人到中年但又唱得的男女提供千載難逢的演出平台，向夢想再出發。節目昨晚（27日）起首播，逢周日晚九點半於翡翠台播映，並由車婉婉擔任主持，評審團則為Maria Cordero（肥媽）、張佳添、伍仲衡、林志美、周國豐。
昨晚播出的一集進行第一回合比賽，100強參賽者會以盲選形式作賽，五人評審團會憑「好聲音」撳燈，揀選出五十個晉級人選；得到4盞或5盞燈的選手可直接晉級，50強扣除得到4、5盞燈的剩餘名額，要留待評審團在獲得3盞燈的選手中揀出，只得到2盞燈或以下的選手則會被即時淘汰。節目同時宣布，最終奪得《中年好聲音》冠軍的參賽者，將獲安排主唱TVB劇集歌曲。
是集雲集多位唱得之人，共有十一位參賽者奪得4盞燈或以上直接晉級五十強，當中更有三人獲得五盞燈滿分成績，分別為李泇霖、周吉佩及鮑聖光。現年42歲的李泇霖獻唱《情人知己》，天生靚聲的她成為首位奪得5盞燈的選手，泇霖激動爆喊說：「我由細到大唔係攞F，而係攞U嘅人，我讀書唔叻、細個好肥，一直以嚟冇乜信心，好多謝《中年好聲音》畀機會我唱歌畀大家聽。」張佳添鼓勵她說：「你完全唔使為你身形感到自卑，你睇吓Adele，全世界最紅嘅歌手，佢當年仲肥過你！」
獻唱《如果沒有你》的周吉佩同樣獲得5盞燈佳績，其實他15年前曾出道做歌手，惟在籌備出第二張唱片時，公司因財政問題煞停計劃，令他的歌手夢幻滅，他說：「做歌手呢條路好辛苦，呢15年浮浮沉沉，發展得好唔順利，有人問過我會唔會去做主持，但嗰時細個梗係想音樂行先，我話要唱歌，同嗰邊監製講唔做主持。」肥媽則以自身經歷鼓勵他並大拋金句：「有啲嘢唔使咁執着，我唱唱吓歌人哋叫我煮飯添呀，要對自己有信心，無論做咩都好，只要一日唔離開呢個舞台，一日都有機會！」
至於64歲的鮑聖光為是集年紀最大的參賽者，身為靚聲王的他深情獻唱《倩影》，他一開口唱歌已震懾一班評審，齊齊露出驚訝的表情，他僅獻唱了25秒就成功俘虜五位評審撳燈，成績斐然。伍仲衡大讚：「好有感染力，你唱到入我個心呀，呢首歌同你把聲有一個Magic！」林志美則說：「你唱第一、二句，我哋已經有嘩嘅感覺。」
另直接晉級50強的參賽者，包括譚依婷、龍婷、蔡穎秋、陳樂平、羅金榮、梁浩銓、曹敏寶及顏志恒。至於有「屯門娜娜」之稱的董幸兒表現麻麻，獻唱《風的季節》時掛住擺Pose搞到數度忘詞，張佳添聽到擰晒頭，肥媽更狠批：「你諗嘅嘢多咗，你點會記得歌詞，淨係掛住個Pose。」最終獲得0盞燈被即時淘汰。
