由王祖藍擔任主持的綜藝節目《有個閨密叫祖藍》，前日(7 月 31 日)起、一連八集逢周日晚十點半無綫翡翠台播映;myTV Gold 則緊接於當晚播放 40 分鐘加長版。首集為大家打響頭炮的，是與祖藍相識超過 16 載的蔡少芬(Ada)，祖 藍除了要接受「閨密快問快答」測試、還要孖老友應付製作組事先準備的閨密任務;由 於「閨密任務」老是失驚無神常出現，Ada 忍不住慨嘆「點解上個節目都咁忙」。
快人快語的 Ada 在節目中大談與張晉相處之道，例如會細心聆聽對方想法，又會為大家 情緒設定「紅綠燈」，好讓雙方能在最適合的時候理性討論問題。「撒嬌妻」Ada 亦有乘 機投訴老公是不懂表達愛的「直男」，透露曾因老公不解溫柔的說了「老夫老妻」四個 字，以致二人關係鬧僵:「嗰晚我同朱茵佢哋講番以前拍拖幾開心，跟住返到房叫老公錫 一啖，佢就話『都老夫老妻啦!』跟住我就靜咗，我一路落妝一路喊。咁佢知我唔開心 就問咩事，嗰一刻我就話我好傷心，我哋只係得嗰四、五年，如果已經係老夫老妻，咁 我哋以後係乜嘢?我話我接受唔到，跟住佢就攬住我講 Sorry。第二朝佢就無啦啦又拖 我隻手、又錫我，我忍唔住問我老公:『點解我咁快樂嘅?』佢就話:『係呀老婆!我都 覺得係呀!』」 相當甜蜜。
蔡少芬又憶述當年張晉憑《一代宗師》榮獲金像獎最佳男配角一刻，她在台下遭張家輝取笑「嘩!乜你喊成咁!」之餘，原來入場前既驚且喜的 Ada 與張晉在紅地氈上亦有甜蜜小插曲:「我老公話:『老婆我哋好好享受，唔知有幾多次可以咁做』，所以我哋行(紅地氈)嗰時係跳住行架。」自言與老公「硬碰硬」的 Ada，坦認拍拖時因思想較負面、 每次吵架都會講分手，直到張晉有次出「殺手鐧」成功治好 Ada 的「分手病」:「佢話你再講多一次，我就送你走。隔咗幾日我哋又嗌交，我又話要走，佢就幫我執行李送我走。 跟住我心諗尋日仲係拖住手，今日佢企喺前面拖住個喼。然後我啲眼淚就一路流，張晉呢個時候就擰過嚟問我:『以後仲敢唔敢』，好 Man 架佢，我就話『我唔敢喇』。」
節目尾聲，大唔透的祖藍將原本的「閨密任務」變成「小學雞」級別挑戰，就是與 Ada 分別以文字及語音找張晉，看他先回哪一個。結果張晉秒回祖藍後再視像 Ada，慘敗的 Ada 只能「扮嬲」猛問老公「點解」。未知是否為了挽回面子，Ada 要求張晉在祖藍及觀 眾面前說「我愛你」，令「直男」張晉好掙扎、但最後仍靦腆道出:「我愛你呀，我唔愛你唔會同你一齊啦!」除與老公隔空耍花槍，身為兩女一子之母的 Ada 還會在加長版中 暢談如何向僅兩歲多的兒子說教，以及張晉不為人知的慳錢面。事緣 Ada 與張晉一起看婚姻輔導，輔導員笑指張晉不像 Ada 說般寡言，反而像「開籠雀」說足一小時，Ada 爆張晉事後笑言:「畀咗錢吖嘛」。另 Ada 又一人分飾「囡囡」與「媽咪」示範平時遭囡囡 們管教場面，又謂曾在被訓話期間遭張晉無情「踩多腳」，內容相當爆笑。
